Acts 8

1Ma Saulo bodaedi 'i'ahwa bwebwe'anediya, Sitibeni 'ana lohe'amasa weyahina.

Saulo tohekalesiyao 'ilo'alehediya

Sabwelo nage 'oina tohekalesiyao tupwa Yelusalema 'oina 'adi 'alehaowedi sihegaina ma silo'alehedi, 'oinega sisawala Yudiya ma Sameliya tupwaedi 'oidiya, ma Yesu 'ana tohepwailao site tuwelomo Yelusalema 'oina simiyamiya.

2Ma tupwana tomota, taudi Yehoba 'ana tohe'asisiyao, Sitibeniina sigaliheya ma'idi dou madouna. 3Ma Saulo hesi tohekalesiyao 'imutumutudi ta weyahidi 'iluhuluhu hada 'aigeda 'aigeda 'oidiya, ma 'eguma tohekalesiyao loheloheya ma wete wahiwahine 'ilobalobadi, tuwa 'i'abiyahidi, ma deliya 'ilagu luhuwedi.

Pilipi 'ina guguya tupwa Sameliya 'oina

4Ma tohekalesiyao sisawala, ma 'eguma to tupwa 'oina sitautauya, tetela bwebwe'ana siloguguyaeya tomota 'oidiya. 5Coinega Pilipi 'isulu 'aigeda Sameliya 'asaina 'oina, ma nobwa To'abihetenaina tetelina 'iguguyaeya 'oidiya, 6ta mabwaiyadi Pilipi 'ina gwae sihesagoheya, ma 'ina paihowa waiwaidi si'iteya. 7Ceguma taiyawedi silohala hi'ahi'a* 'oidiyega 'iula latuhedi, ma hi'ahi'aedi siwuiwui ma sihapwesa, ma wete topeuyao ma tohasagesageula 'i'abihe bwebwe'anediya. Coinega bodaedi sitagwatagwala mahemahetena Pilipi 'ina loguguya 'oina, 8ma 'oinega 'ebe yaliyaya madouna gogoina 'oina.

9Ma toni'asa 'aigeda, sanina Saimoni, tauna Pilipi 'ina gwae 'ihemiseya. Saimoniina tauna mwalo 'i'oba'oba madouna gogoina 'oina, 10ma meSameliya mabwaiyadi sihenainaida Saimoni 'ina paihowa waiwaidi weyahidi, eema tauna sanina madouna. Coinega tomota mabwaiyadi, nuwana babadao, nuwana bubutumao, Saimoniina sihemisaeya ma sigwaegwae, “Tauna Saimoniina 'ina waiwai Yehoba 'oinega madou hedadena.”

11Coinega Saimoni 'ina gwaeyao sihesagohediya, weyahina 'ina 'obega 'i'abihenuwa pwanopwanowediya tuta mabwaiyana.

12Ma muliyetega Pilipi 'ihapwesama ma tetela bwebwe'ana, To'abihetena Yesu sanina ma Yehoba 'ina loina weyahidi 'iloguguya, ma sihemisaeya, ma sibabitaisowa, loheloheya ma wete wahiwahine. 13Ma Saimoni wete Yehoba 'ihemiseya, ta 'ina babitaiso mulina Saimoni Pilipi 'i'wayabuya ma Saimoniina 'i'iteya Pilipi 'ina 'ila'ilalao ma 'ina paihowa waiwaidi, ta 'oinega 'ihenainaida moisa.

14Eeta Yesu 'ana tohepwailao taudi Yelusalema 'oina simiyamiya, tetela sihesagoheya 'abehega meSameliya sitagwala pwaiya Yehoba 'ina gwae 'oina, 'oinega Pita ma Yoni sihewasedima, 15ta siteluwaedi sisuluwa Sameliya 'oina, ma tohemisao hauhaudi weyahidi si'ahwa'ahwanoi ma 'abehega Yaluyaluwa Tabuna 'iluhu 'oidiya. 16Weyahina 'abwa geya 'iluhu 'oidiya. Beno tuwa Bada Yesu saninega sibabitaisowa, 17'oinega Pita ma Yoni nimadi silagudiya 'oidiya ta Yaluyaluwa Tabuna 'oidiya 'iluhuwa. 18Ta Saimoni paihowa bewa 'i'iteya 'abehega Yesu 'ana tohepwailao nimadi silagudiya tomota 'oidiya, ma Yaluyaluwa Tabuna 'oidiya 'iluhuwa, 'oinega mane 'i'eweya ma 'abehega Pita ma Yoni 'i'ebwaedi, 19ta 'igwaeya, “Cimi waiwai beno nuwanuwagu wa'ebwaegau, ma 'oinega 'eguma nimagu yalagu taiyawedi 'oidiya, Yaluyaluwa Tabuna 'iluhu 'oidiya.”

20Ma Pita Saimoni 'iheliyeya 'igwae, “Cino mane ba'idau wahesilae hataya, weyahina 'abehega Yehoba 'ina 'ehele 'ino maneyega 'ugimwane. 21Cowa geya 'ima boda, ma hesi 'ateu 'imumuga galagala Yehoba matana. 22Coinega 'ilobwainegowa ma 'ino pui bewa 'oinega 'unuwabui, ma 'u'ahwa'ahwanoi Yehoba 'oina, ma nuwana 'ino nuwatuhu galadi bewa 'inuwasamudi. 23Weyahina yasanapugowa 'ateu bi'ibi'ina, he'ipi'ipi ma mumugau galadi 'oidiyega.”

24Ma Saimoni 'igwaeya, “Wa'ahwanoi Bada 'oina ma ginaulaedi galadi wahepwailediya, sahena 'oiguwa sinaonaoma.”

25Coinega Pita ma Yoni 'idi Bada weyahina sihepwaila latuwa, ma 'ina gwae siguguyaeya, ma muliyetega sihila Yelusalema 'oina, ta 'idi tauya 'alona tetela bwebwe'ana sihepwaileya Sameliya 'asanao 'aigeda 'aigeda 'oidiya.

Pilipi gwama Idiopiya 'aigeda 'i'abi hebabitaisoya

26Ma Yehoba 'ina anelose Pilipi 'ihegwaeya, “Cutoholo ma 'asudibwalala 'edaina Yelusalemega ma 'asa Gasa 'oina 'utauya.” Cedaina tupwa yoho 'awawa 'alonega 'itautau. 27Coinega Pilipi 'itoholowa ma 'itauya, ma gwama Idiopiya 'ina waga lisilisi* 'oinega 'itautauya 'ilobeya, tauna 'wawana bo'i si'ewa yahuleya, ma sanina madouna, ta 'idi kuini Kanidesi weyahina 'ipaipaihowa, beno 'ina wasawasa mabwaiyana 'i'ita'itayahidi, ma tauna 'itauya pwaima Yelusalema sabi tapwalolo, 28ta 'ina waga lisilisi 'ihilahila 'ina 'asai, waga lisilisiina 'oina 'igeluwa ma Buki He'asisi 'ihasihasila, palopita Aiseya 'ina lele 'ihasihasili.

29Ma Yaluyaluwa Tabuna Pilipi 'ihegwaeya, “Culomwayamwayau ma 'utauya waga lisilisi 'oina.” 30Coinega Pilipi 'ipiliya, ma loheyaina 'enana 'ihesagoheya palopita Aiseya 'ina lele 'ihasihasili. Ta Pilipi 'igwaeya, “Togidega, gwaeyedi 'uhasihasili 'usanapudiya?”

31Ta loheyaina 'igwaeya, “Geya. Weyahina geya wete 'igu tohe'itamo.” Coinega loheyaina Pilipi 'ibwauweyama wagai, ma Pilipi 'igeluwa ta deina 'imiyatoiya, ta Buki He'asisiina 'ihasiliya, 32ta hasiliina 'ihasila pwaiya bewa gide 'ina gwae,

“Tauna gide sipi nata sihunu, nuwana gidemusa lami*, hunuhunuwana 'ana to'upwa matana 'itotoholo, geya 'aigeda wete 'enana 'igwae latu. 33Ma wete 'ina yatala 'oina si'aboweya, ma 'idebamwadina. Coinega natunao tetelidi geya 'aigeda taiya 'ihepwaila latu weyahina yawasina bale'uwa 'igumwagumwala.”
34Ta gwama Idiopiyaina Pilipi 'ihegwaeya, “Taiya weyahina palopita bewa 'igwaegwaeya? Tauna weyahina bo hali loheya weyahina?”

35Coinega Pilipi 'igwaeya, “Yesu weyahina,” ma 'ihegaina hasilaina 'ana lihasa weyahina ta Yesu tetelina 'ihe'itaeya.

36Ta 'edaina sitautau ta we'aha si'ita lobeya, ma loheyaina 'igwaeya, “Nage we'aha! Togidega, sowasowahina ma 'u'abihe babitaisogau, 'awa?”

38Coinega 'ina topaihowao 'iloinaediya ma waga lisilisi* si'abi henonoya, ma siteluwa Pilipi mahetena sisuluwa ta sigayo suluwa we'aha, ma Pilipi loheyaina 'i'abihe babitaisoya. 39Ma we'ahega sigayohanema ta Yehoba Yaluyaluwana Pilipi 'itoeya, ma loheyaina geya Pilipi 'i'ita'ita hila, ta ma'ina yaliyaya 'itauya 'ina 'asa.

40Ma Pilipi hesi silobeya tupwa Asota 'oina, ma 'oinega 'itautau, ma tetela bwebwe'ana 'iloguguyaeya 'asa 'aigeda 'aigeda 'oidiya, ma 'ana siga 'ilatu Sisaliya.